DIE VIERING VAN DIE HEILIGE MIS
Die HEILIGE EUCHARISTIE d.w.s. die VIERING VAN DIE HEILIGE MIS is "die bron en hoogtepunt van die Christelike lewe". (Kategismus van die Katolieke Kerk 1324) Die viering van die Heilige Mis is 'n Liturgiese aksie; die viering van die geheimenisse van Christus, in die besonder van sy Paasgeheimenisse.
In hierdie perfekte vorm van aanbidding en met elke Heilige Mis-viering vind die volgende plaas: ons kom bymekaar om God te dank vir al die seëninge wat Hy aan ons geskenk het, met een van die grootste gawes die gawe van Homself in die Eucharistie.
Hierdie heilige handelinge vorm by uitstek die hoogtepunt waarna al die Kerk se aksies strewe, en is die bron waaruit alle lewenskrag voortvloei. (Kompendium van die Kategismus van die Katolieke Kerk 218-219 )
Die middelpunt van die liturgiese tyd is die Sondag, die grondslag en kern van die hele liturgiese jaar, wat sy hoogtepunt bereik in die jaarlikse Paasfees, die fees bo alle feeste.
